Me pikëllim të thellë, komuniteti i Kosovës ka marrë lajmin për ndarjen nga jeta të veteranit të Ushtrisë Çlirimtare të Kosovës (UÇK) dhe ish-punëtorit të Korporatës Energjetike të Kosovës (KEK), Cenë Kadrijaj. Ai ishte gjithashtu anëtar aktiv i Sindikatës së Re të KEK-ut.
Sindikata e Re e KEK-ut, në një njoftim mortor, e përshkroi Kadrijajn si një luftëtar të palodhshëm për liri, një koleg të çmuar dhe një individ me përkushtim të jashtëzakonshëm ndaj atdheut dhe detyrës.
Kadrijaj iu bashkua radhëve të UÇK-së në vitin 1997, duke marrë pjesë aktive në beteja të shumta për çlirimin e Kosovës. Ai u plagos gjatë luftës, por edhe gjatë periudhës së shërimit, përkushtimi i tij ndaj çështjes së lirisë nuk u ndal.
Pas përfundimit të luftës, Cenë Kadrijaj u kthye në jetën civile, duke filluar punën në KEK. Aty, ai u dallua për punën e tij të ndershme dhe përkushtimin mes kolegëve, duke lënë gjurmë të forta.
Sindikata e Re e KEK-ut theksoi cilësitë e tij si njeri i urtë, zemërbardhë dhe tepër i respektuar nga të gjithë ata që patën fatin ta njohin. “Sot nuk humbi vetëm familja një njeri të dashur, por edhe shokët një mik, punëtorët një koleg, ndërsa Kosova një luftëtar të saj”, theksohet në reagimin e sindikatës.
Ceremonia mortore për Cenë Kadrijaj do të mbahet më 13 maj 2026, në orën 18:00, në Varrezat e Aqarevës në Skenderaj.
