William Walker, ish-shefi i Misionit Verifikues të OSBE-së në Kosovë, ka shprehur shqetësim të thellë lidhur me vendimin e fundit të Dhomave të Specializuara në Hagë, të cilat dënuan katër ish-krerë të Ushtrisë Çlirimtare të Kosovës (UÇK) me gjithsej 81 vjet burgim. Walker e konsideron këtë moment si një krizë të rëndë për Kosovën, Ballkanin dhe për vetë Evropën.
Ish-diplomati amerikan ka kritikuar ashpër procesin gjyqësor, duke e cilësuar si një shembull të keqmenaxhimit të drejtësisë që ka shoqëruar këtë çështje që nga fillimi. Ai shprehu zhgënjimin e tij ndaj Bashkimit Evropian, duke theksuar se është krijuar një qasje që barazon krimet e luftës, duke paraqitur një imazh të padrejtë të konfliktit.
Në një intervistë ekskluzive për A2 CNN, Walker ngriti një pyetje thelbësore që hedh dyshime mbi integritetin e procesit: Pse presidenti i Serbisë, Aleksandar Vuçiq, nuk u thirr për të dëshmuar në Hagë?
Fluturim direkt – Prishtinë → Stuttgart
Nisje: çdo ditë
Fluturim direkt – Prishtinë → Munich
Nisje: çdo ditë
Fluturim direkt – Prishtinë → Goteburg
Nisje: çdo ditë
“Jam shumë i mërzitur me BE-në, e cila për arsye politike ka dashur të krijojë një barazim për krimet e tmerrshme të kryera nga qeveria e Serbisë, përfshirë Vuçiqin”, deklaroi Walker, duke theksuar shqetësimin e tij për këtë qasje.
Ai shtoi se është e paqartë arsyeja pse Vuçiq nuk është marrë në pyetje nga Zyra e Prokurorisë Speciale. “Pse nuk është thirrur ai në Hagë për të dëshmuar? Nuk e kuptoj pse BE-ja ka formuar një trup gjykues për të akuzuar shqiptarët”, tha Walker.
Duke iu referuar veprimeve të vazhdueshme të Vuçiqit, Walker vuri në dukje se presidenti serb vazhdon të aplikojë taktikat propagandistike të mësuara gjatë periudhës kur shërbente si ministër i Informacionit në qeverinë e Slobodan Millosheviçit. “Nëse kthehem te Vuçiqi, ai ende vepron si ministër i propagandës në kohën e Millosheviçit. Prandaj, jam shumë i zhgënjyer me BE-në për këtë qasje të paragjykuar, e cila ka shumë për të fajësuar për tmerret e kryera”, përfundoi Walker.
