Presidenti serb Aleksandar Vuçiç e quajti vendimin e SHBA-ve për të sanksionuar Naftna Industrija Srbije, rafinerinë e vetme të vendit që kontrollohet nga Gazprom, “shumë të ashpër” dhe tha se do të nevojitet një lloj transaksioni për të siguruar funksionimin e saj.
“Nuk është një situatë e lehtë për Serbinë”, deklaroi Vuçiç për Bloomberg në një intervistë në Beograd të premten, menjëherë pasi SHBA-të vendosën sanksionet më agresive ndaj industrisë ruse të naftës. “Si një vend i vogël, ne jemi me shpatulla pas murit për shkak të interesave të shteteve të mëdha”.
Serbia ka 45 ditë, ose deri më 25 shkurt, për të negociuar çfarëdo zgjidhje që është e zbatueshme për NIS-in, dhe 15 ditë të tjera për një pagesë të mundshme “nëse ka diçka për t’u paguar”, shtoi presidenti serb.
Vuçiç paralajmëroi muajin e kaluar se NIS mund të vihet nën sanksione, duke i kërkuar qeverisë së tij të përgatitet për çdo masë ndëshkuese që mund të dëmtojë ekonominë.
Një marrje e detyrueshme e aksioneve ruse do të ishte opsioni i fundit, ka thënë Vuçiç, teksa kërkon të balancojë lidhjet e Serbisë me fuqitë perëndimore, Rusinë dhe Kinën.
Presidenti i Serbisë përsëriti qëndrimin e tij të premten.
“Unë nuk jam në favor të nacionalizimit”, tha ai. “Ne nuk jemi komunistë. Unë nuk dua t’i marr pasuritë e askujt falas”
