SHBA-të sanksionojnë rafinerinë serbe të kontrolluar nga Gazprom
Thesari i SHBA-ve sanksionoi Naftna Industrija Srbije, rafinerinë e vetme të Serbisë që kontrollohet nga Gazprom, si pjesë e një pakete të re masash gjithëpërfshirëse që synojnë prodhuesit rusë të energjisë, raporton Bloomberg.
Presidenti serb Aleksandar Vuçiç paralajmëroi muajin e kaluar se NIS mund të vihet nën sanksione, duke i kërkuar qeverisë së tij të përgatitet për çdo masë ndëshkuese që mund të dëmtojë ekonominë.
Një marrje e detyrueshme e aksioneve ruse do të ishte opsioni i fundit, ka thënë Vuçiç, teksa kërkon të balancojë lidhjet e Serbisë me fuqitë perëndimore, Rusinë dhe Kinën.
“Shtetet e Bashkuara po vendosin sot sanksione ndaj më shumë se 200 subjekteve dhe individëve të përfshirë në sektorin energjetik të Rusisë dhe duke identifikuar më shumë se 180 anije si pronë të bllokuar. Ky veprim i gjerë dhe i fuqishëm do të kufizojë më tej të ardhurat nga burimet energjetike të Rusisë dhe do të degradojë aftësinë e Putinit për të financuar luftën e tij të paligjshme kundër Ukrainës”, shkruhet në njoftimin e DASH-it.
Departamenti i Thesarit po sanksionon njëkohësisht më shumë se 150 subjekte dhe individë, duke përfshirë prodhuesit kryesorë rusë të naftës Gazprom Neft dhe Surgutneftegas, kompani ruse të sigurimit dhe anije të flotës në hije, shton njoftimi zyrtar.
