Fansat e Rihannës janë kthyer në gjendje alarmi pas një deklarate të re nga superylli i muzikës dhe biznesit. Gjatë një transmetimi të drejtpërdrejtë për markën e saj Fenty Beauty në platformën TikTok, Rihanna la të kuptohet se posedon një arkiv të jashtëzakonshëm këngësh të cilat ende nuk i kanë parë dritën e publikut.
E pyetur drejtpërdrejt për materialin e saj muzikor të papublikuar, këngëtarja bëri një analogji me produktin e saj popullor “Gloss Bomb Vault”, i cili përmban dhjetë produkte. Ajo tha me humor: “Nëse këtu janë dhjetë produkte, atëherë unë kam të paktën 17 kuti me këngë.”
Kjo deklaratë e Rihannës ka nxitur menjëherë spekulime dhe përllogaritje mes fansave të saj, të cilët vlerësojnë se ajo mund të ketë rreth 170 këngë të papublikuara. Megjithatë, këngëtarja nuk ka konfirmuar shifrën dhe as nuk ka dhënë detaje nëse këto kompozime do të jenë pjesë e albumit të saj të shumëpritur, i njohur si “R9”.
Ky mister i shtuar rrit më tej pritshmërinë për rikthimin e saj muzikor, pasi albumi i fundit i Rihannës, “Anti”, u publikua në vitin 2016. Që atëherë, industria muzikore dhe adhuruesit në mbarë botën po presin me padurim projektin e saj të nëntë në studio.
