A ju ka ndodhur të hyni në një dhomë dhe papritur të harroni arsyen pse keni shkuar aty? Ky fenomen, i njohur si ‘Doorway Effect’ ose ‘Efekti i Pragut’, po merr gjithnjë e më shumë vëmendje nga psikologët, pasi shpjegon një situatë tejet të zakonshme.
Sipas ekspertëve, kjo nuk është domosdoshmërisht një shenjë problemesh me kujtesën, por më tepër një mënyrë se si funksionon truri ynë. Ky efekt ndodh pasi truri e percepton kalimin nga një ambient në tjetrin si një ‘kapitull të ri’, duke fshirë në mënyrë efektive informacionin afatshkurtër që lidhet me hapësirën e mëparshme. Si pasojë, mendimi që kishit para se të kalonit pragun mund të humbasë përkohësisht.
Psikologja Dr. Sanam Hafeez shpjegon se individët që përjetojnë shpesh këtë fenomen zakonisht kanë mendje shumë aktive. Ata priren të mendojnë për shumë gjëra njëkohësisht, të planifikojnë vazhdimisht dhe të kalojnë shpejt nga një ide në tjetrën. Gjithashtu, multitasking-u, stresi dhe mbingarkesa mendore luajnë një rol të drejtpërdrejtë në këtë lloj harrese.
Interesant është fakti se ky fenomen lidhet shpesh edhe me kreativitetin. Personat kreativë kanë tendencë të shpërndajnë vëmendjen e tyre në disa drejtime, çka i bën më të prirur të harrojnë detaje më të vogla, siç është arsyeja pse hynë në një dhomë. Një ritëm i shpejtë jetese dhe përqendrimi në mendime më të mëdha mund të ndikojnë gjithashtu në këtë proces.
Megjithatë, ekspertët theksojnë se në shumicën e rasteve nuk ka arsye për shqetësim. Vetëm nëse harresa bëhet e shpeshtë, përkeqësohet me kalimin e kohës, ose shoqërohet me konfuzion dhe vështirësi në kujtesën e përditshme, rekomandohet konsultimi me një specialist mjekësor.
