Vetëm një ditë pas përurimit zyrtar, tabelat me emrat e rrugëve “Isa Boletini” dhe “Zoran Dindiq” në Mitrovicën e Veriut janë zhvendosur nga vendndodhjet fillestare, duke ngritur pyetje rreth procesit dhe autorëve të këtij veprimi.
Vendimi për emërtimin e këtyre dy rrugëve, njëra me emrin e heroit kombëtar shqiptar dhe tjetra e ish-kryeministrit serb, fillimisht u përurua nga ministrja në detyrë e Planifikimit Hapësinor, Fitore Pacolli, të mërkurën, më 3 qershor. Megjithatë, të enjten, brenda më pak se 24 orësh, tabelat u gjetën të vendosura në lokacione të ndryshme, duke u distancuar nga njëra-tjetra.
Kryetari i komunës së Mitrovicës së Veriut, Milan Radojeviq, ka kontestuar ligjshmërinë e procesit të emërtimit, duke e cilësuar si të paligjshëm vendimin e marrë nga udhëheqja e kaluar. Sipas tij, mungon procesverbali i komisionit, nuk ka pasur pjesëmarrje serbe në komision dhe nuk është zhvilluar debat publik.
“Vendimi i sjellë nga udhëheqja e kaluar është plotësisht i paligjshëm, nuk është në përputhje me ligjin, nuk ekziston procesverbali i komisionit, asnjë serb nuk ka marrë pjesë në atë komision dhe nuk është mbajtur asnjë debat publik për riemërtimin e rrugëve. Prandaj, gjithçka që po bëhet është plotësisht e paligjshme dhe kjo do të dëshmohet në gjykatë”, ka deklaruar Radojeviq.
Nga ana tjetër, zv.kryesuesja e Kuvendit Komunal, Aida Ferati-Doli, ka ofruar një version tjetër, duke theksuar se procedura e emërtimit të rrugëve ka ndjekur vendimet e komisionit përkatës, i cili kishte një përbërje prej gjashtë anëtarësh, përfshirë edhe përfaqësues serbë.
“Ka qenë një përbërje prej gjashtë anëtarëve të komisionit, kemi pas edhe të nacionalitet serb aty. Për shkak të presionit nga Beogradi që I është bërë presionit në fjalë, është largu personi dhe ne kemi vazhdu me emërimin”, ka shpjeguar Ferati-Doli.
Lidhur me zhvendosjen e tabelave, Ferati-Doli ka theksuar se nëse ky veprim është bërë nga drejtuesit e komunës pa miratim të Kuvendit Komunal, atëherë ai është i jashtëligjshëm.
Ministria e Planifikimit Hapësinor, deri të enjten në mesditë, nuk ka dhënë informacione zyrtare nëse posedon të dhëna për arsyet e zhvendosjes së tabelave të rrugëve, duke lënë çështjen pezull dhe duke shtuar nivelin e konfuzionit.
