Kryeministri në detyrë, Albin Kurti, ka shprehur shqetësimin e tij lidhur me reagimin e institucioneve të sigurisë dhe drejtësisë pas incidentit të ndodhur në Skenderaj, ku u përfshinë zëvendësministri i Financave, Hysen Mehani, dhe kryetari i Vetëvendosjes në Skenderaj.
Kurti theksoi se askush nuk mund ta sfidojë shtetin dhe sundimin e ligjit në Kosovë. “Në republikën e Kosovës nuk ka forcë, nuk mund të ketë asnjë individ dhe asnjë grup që sfidon suksesin e shtetit. E shteti është drejtësia e ligjeve. Ligji i drejtë i Republikës na bën bashkë si shoqëri sepse na barazon para tij. E jo si dikur që na ndante në të pambrojtur e të paprekshëm”, tha ai.
Duke iu referuar incidentit në lokalin ku u rrah zëvendësministri Mehani, Kurti tha se ka pasur kamera dhe dëshmitarë, duke shtuar se reagimi i policisë dhe prokurorisë duhet të kishte qenë më i shpejtë. “Në lokalin në Skenderaj në të cilin është rrahur e përgjakur zëvendësministri në Ministrinë e Financave Hysen Mehmeti. Njëkohësisht edhe kryetari i qendrës së Vetëvendosjes atje. Njëkohësisht edhe kandidat për deputet për legjislaturën e 19-të. Ka kamera dhe ka shumë dëshmitarë. Me ç’mora vesh dy veta janë arrestuar. Por, për përshtypjen time reagimi edhe i policisë edhe i prokurorisë ka qenë i vonuar. Unë nuk e di se çfarë ka ndodhur më pastaj në orët e pasmesnatës, por e di që reagimi është dashur të jetë shumë më i shpejtë”, theksoi Kurti.
Ai bëri një krahasim me rastet e mëparshme, duke përmendur dënimet ndaj aktivistëve të Vetëvendosjes për postime në rrjete sociale. “Ju e dini që aktivistët e Vetëvendosjes për statuse në Facebook janë dënuar me nga një vit e gjysmë burg. Ta shohim tash, prokuroria për ata që marrin me grusht edhe përgjakin zëvendësministra, çfarë dënimi do të kërkojë, dhe çfarë dënimi do të japë gjyqësori”, përfundoi ai.
