Një nga rastet më tronditëse të vrasjeve seriale në Iran ka kulmuar me dënimin me vdekje për Kolshoum Akbari, e njohur në mediat vendase si “Vejusha e Zezë”. Akuzuar për vrasjen e 11 burrave të moshuar dhe një tentative vrasjeje, Akbari dyshohet se ka operuar për më shumë se dy dekada, nga fillimi i viteve 2000 deri në arrestimin e saj vitin e kaluar.
Hetimet zbulojnë se viktimat e saj kryesore ishin burra të moshuar, shpesh të ve ose jetimë. Akbari fitonte besimin e tyre, martohej dhe më pas i helmonte. Autoritetet iraniane kanë bërë të ditur se ajo përdorte një përzierje qetësuesish, medikamentesh për diabet, alkool industrial dhe substanca të tjera, të cilat i administronte drejtpërdrejt ose i fuste në ushqim dhe pije. Për shkak të moshës dhe gjendjes shëndetësore të viktimave, shumë nga këto vdekje u klasifikuan fillimisht si natyrore.
Rasti mori dritë në vitin 2023 pas vdekjes së bashkëshortit të saj të fundit, një 82-vjeçar. Para se të ndërronte jetë, ai kishte pohuar se Akbari e detyronte të merrte ilaçe që i shkaktonin humbje ndjenjash. Pas denoncimit nga familja e tij, hetuesit zbuluan një rrjet të gjerë, duke përfshirë martesa të tjera me burra që kishin vdekur pak kohë pas ceremonisë. Hetimet u shtrinë edhe në raste të mëparshme, duke kërkuar zhvarrime dhe analiza të reja toksikologjike.
Fluturim direkt – Prishtinë → Stuttgart
Nisje: çdo ditë
Fluturim direkt – Prishtinë → Munich
Nisje: çdo ditë
Fluturim direkt – Prishtinë → Goteburg
Nisje: çdo ditë
Motivi kryesor dyshohet të ketë qenë financiar. Akbari akuzohet se i bindte disa nga bashkëshortët e saj të transferonin prona dhe automjete, ndërsa përfitonte edhe nga pensionet dhe kursimet e tyre. Pas procesit gjyqësor, ajo u shpall fajtore për 11 vrasje të qëllimshme dhe një tentativë vrasjeje. Dhjetë familje të viktimave kërkuan ekzekutimin e saj, ndërsa njëra familje preferoi kompensimin financiar. Si pasojë, Akbari u dënua me vdekje dhjetë herë dhe me dhjetë vjet burg për tentativën e vrasjes. Gjykata ka urdhëruar gjithashtu konfiskimin e pasurisë së saj, por vendimi mund të apelohet.
