Një vjedhje e rëndë është zbuluar në Ferizaj, ku persona të panjohur kanë hyrë në një shtëpi pa përdorur forcë dhe kanë dalë me mbi 45 mijë euro para dhe stoli ari.
Ngjarja ka ndodhur në rrugën “Selim Badovci”, ndërsa rasti është raportuar dje pas mesnate, rreth orës 00:00.
Siç mëson Sinjali, pronari i shtëpisë, B. I, 54 vjeç, kishte dalë nga banesa rreth orës 18:30, duke lënë çelësin pranë derës hyrëse, në një vazo.
Ky detaj është shfrytëzuar nga të dyshuarit, të cilët kanë hyrë brenda pa thyerje, pa zhurmë dhe pa lënë shenja të dukshme hyrjeje.
Alarmi është dhënë nga vajza e tij, L. I, e cila kur është kthyer në shtëpi rreth orës 23:25, ka hasur në një skenë të rrëmujshme, me çdo hapësirë të kontrolluar dhe të bastisur.
Sipas ankuesit, nga shtëpia janë marrë:
• rreth 40 mijë euro para të gatshme
• stoli ari në vlerë rreth 5 mijë euro
Pas kryerjes së vjedhjes, dera është mbyllur sërish, duke e bërë të vështirë që në shikim të parë të kuptohej se kishte ndodhur ndonjë hyrje e paautorizuar.
Në vendin e ngjarjes kanë dalë njësitet e hetimeve rajonale dhe forenzika, të cilat kanë kryer ekzaminimet dhe mbledhjen e provave.
Me urdhër të prokurorit kujdestar, rasti është iniciuar si “Vjedhje e rëndë”, ndërsa hetimet janë duke vazhduar për identifikimin e të dyshuarve.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
PRISHTINA POST– aty ku e vërteta flet para lajmit!
