Gjykata Supreme e Shteteve të Bashkuara ka rrëzuar përpjekjen e presidentit amerikan Donald Trump për t’i dhënë fund të drejtës së shtetësisë automatike për personat e lindur në territorin amerikan.
Vendimi i gjykatës ka bllokuar urdhrin ekzekutiv të Trumpit, i cili synonte të ndryshonte një parim ligjor të zbatuar prej më shumë se një shekulli.
Çështja ishte një nga pikat kryesore të agjendës së tij për emigracionin, ndonëse juristë të shumtë kishin ngritur dyshime mbi bazën e saj ligjore, raporton CNN.
Me këtë vendim mbetet në fuqi interpretimi aktual i Kushtetutës amerikane, bazuar në të cilit çdo person i lindur në Shtetet e Bashkuara konsiderohet automatikisht shtetas amerikan, pavarësisht statusit të prindërve.
Vendimi përbën një goditje të rëndësishme politike për Trumpin, i cili gjatë fushatës së tij kishte premtuar t’i jepte fund të ashtuquajturit “turizëm i lindjeve” dhe kishte vendosur kufizimin e emigracionit në qendër të politikave të tij.
Kryetari i Gjykatës Supreme, John Roberts, ka shkruar opinionin e shumicës së gjyqtarëve, ku janë përfshirë edhe anëtarë konservatorë dhe liberalë të gjykatës.
Ndërkohë, tre gjyqtarë konservatorë – Clarence Thomas, Samuel Alito dhe Neil Gorsuch – kanë kundërshtuar vendimin.
“Qytetaria, atëherë dhe sot, ishte e drejta për të pasur të drejta – për të marrë pjesë lirisht në komunitetin tonë politik”, ka shkruar Roberts, duke iu referuar Amendamentit të Katërmbëdhjetë të Kushtetutës amerikane, i cili garanton shtetësinë për personat e lindur në SHBA.
Vendimi i Gjykatës Supreme pritet të ketë ndikim të madh në debatin politik në Shtetet e Bashkuara për emigracionin dhe të drejtat kushtetuese.
Prishtina Post – lajme të shpejta dhe të sakta.
