Tirana u përfshi sot nga një protestë e dhunshme studentore, e cila zgjati rreth nëntë orë dhe prodhoi tensione të forta, dhjetëra shoqërime nga policia dhe incidente të rënda. Protesta, e cila nisi para Ministrisë së Arsimit, u zhvendos shpejt drejt Bashkisë së Tiranës, ku protestuesit i vunë flakën godinës.
Situata u përshkallëzua më tej në zonën e “Pazari i Ri”, ku zjarrvënësit dogjën koshat e mbeturinave, duke krijuar kaos dhe panik në rrugët e kryeqytetit. Përplasjet mes studentëve dhe forcave të policisë ishin të shumta, ndërsa numri i personave të shoqëruar nga policia arriti në mbi 40.
Një rast i rëndë u raportua nga një student, i cili pësoi një lëndim të rëndë duke thyer këmbën. Fillimisht u raportua se ai ndodhej në gjendje kome, duke shtuar shqetësimin dhe alarmimin për gjendjen e tij shëndetësore, ndërsa aktualisht i është nënshtruar një operacioni.
Forca të shumta policore u angazhuan për të shpërndarë protestuesit, duke vendosur gardh mbrojtës në disa akse kryesore të qytetit. Raportime nga protestuesit tregojnë për përdorim të dhunës nga ana e policisë, me goditje me grushte dhe shkopinj gome, si dhe tërheqje zvarrë të disa studentëve gjatë shoqërimit. Kjo situatë ka krijuar një atmosferë frike dhe pasigurie, duke reflektuar një revoltë të thellë dhe një ndjenjë të fortë padrejtësie mes studentëve.
