Këngëtari i njohur kosovar, Sinan Vllasaliu, ka pësuar një aksident trafiku që ka sjellë shqetësime për gjendjen e tij shëndetësore.
Detajet e fundit rreth shëndetit të Vllasaliut janë bërë të ditura nga vajza e tij, Edona, e cila ka konfirmuar se aksidenti ka ndikuar edhe në angazhimet e tij profesionale.
Për shkak të lëndimeve të marra, Vllasaliu nuk ka mundur të marrë pjesë në dasmën e yllit botëror Dua Lipa, ku ishte i ftuar për të performuar.
“Babi im, i cili me shumë dashuri për muzikën ishte i ftuar të këndonte edhe në dasmën e Dua Lipa, fatkeqësisht nuk mundi të ishte prezent për shkak të këtij aksidenti. Megjithatë, sot mbi të gjitha jemi mirënjohës që ai është në duar të sigurta dhe po rikuperohet”, ka shkruar Edona Vllasaliu Kurteshi në rrjetet sociale, duke shtuar një fotografi nga profili i saj.
Ky lajm ka shkaktuar shqetësim në mesin e fansave të këngëtarit, të cilët i urojnë shërim të shpejtë.
