Selin Bollati, e njohur për fitoren e saj në edicionin e pestë të formatit televiziv “Big Brother VIP Albania”, ka ngjallur kureshtjen e publikut me detaje të reja rreth dasmës së saj me DJ Gimbon. Gjatë një paraqitjeje në emisionin “Goca dhe Gra”, Bollati ka konfirmuar se data e ceremonisë do të jetë me numrin 5, duke lënë të kuptohet se shumë detaje të tjera do të mbeten për t’u zbuluar.
Moderatorja Orinda Huta ka tentuar të nxjerrë më shumë informacione nga Selini, duke e pyetur për datën e saktë të dasmës. Megjithatë, ish-banorja e “Big Brother VIP” ka preferuar të ruajë misterin, duke mos zbuluar as muajin, as vitin e martesës. “E sigurt që do të jetë më datë 5, kaq mund të them,” ka deklaruar ajo, duke lënë të kuptohet se ka një plan të qartë, por duke mos dhënë hollësi të mëtejshme.
Biseda mes tyre ka vijuar në mënyrë gazmore, ku edhe moderatorja Mira Kazhani ka shprehur dëshirën për të mësuar më shumë. Selini, duke iu përgjigjur me humor, ka sugjeruar kthimin e zbulimit të datës së dasmës në një “serial”, duke e krahasuar me një produksion televiziv.
