Në Klinikën Infektive, disa pacientë janë duke u trajtuar për COVID-19, sipas raportimeve të fundit. Rishfaqja e rasteve me COVID-19 ka bërë që të rikthehet vëmendja tek pandemia, sidomos me rritjen e numrit të infektuarve. Edhe pse pandemia është zbutur ndjeshëm, COVID-19 ende paraqet rrezik, veçanërisht për grupet më të rrezikuara si të moshuarit dhe personat me sëmundje kronike. Klinika Infektive është duke ndjekur masat e nevojshme për të trajtuar këta pacientë dhe për të parandaluar përhapjen e mëtejshme të virusit.
Nga Infektivja kanë konfirmuar që numri i pacientëve që po trajtohen në këtë klinikë dje ka qenë 13, teksa gjendja e të gjithëve është stabile.
Për Indeksonline pohojnë po ashtu se ka edhe pacientë që po trajtohen për Covid dhe sëmundje të tjera shoqëruese nëpër klinika të tjera të QKUK-së dhe se gjendja e tyre, po ashtu, është stabile.
Numri i rasteve me Covid është rritur lehtë tani që është shfaqur një tjetër virus shqetësues, ai e lisë së majmunit.
Për këtë të fundit, edhe Instituti Kombëtar i Shëndetësisë Publike ka bërë thirrje të kihet kujdes të shtuar dhe të ndjeken udhëzimet e Qendrës Evropiane për Parandalimin dhe Kontrollin e Sëmundjeve, sidomos ata që kanë udhëtuar drejt Afrikës, ku edhe është vatra e këtij virusi.
