Legjenda franceze e futbollit, Michel Platini, ka hedhur kritika të forta ndaj futbollit të ditëveve tona, duke e përshkruar atë si një botë të mbushur me ‘mercenarë’ dhe të dominuar nga marketingu.
Në një intervistë ekskluzive për gazetën prestigjioze L’Équipe, Platini ka theksuar se ndërsa shëndeti mendor i futbollistëve është një temë e rëndësishme, ai shpreh pak mirëkuptim për ata që e bëjnë publike këtë sfidë. Sipas tij, lojtarët kanë zgjedhur vetë këtë karrierë dhe duhet të përballen me pasojat.
“A e kuptoj që lojtarët duhet të çlirohen, veçanërisht kur bëhet fjalë për shëndetin e tyre mendor? Jo. Ata e kanë zgjedhur këtë rrugë dhe tani duhet të jetojnë me të,” ka deklaruar Platini, duke nënvizuar se fama dhe pasuria vijnë me çmime të larta.
Ai shtoi: “Nëse nuk mund të jetojnë me të, duhet të bëjnë diçka tjetër. Një lojtar gjykohet nga performancat e tij në fushë, jo nga gjendja shpirtërore apo deklaratat e tij për shtypin.”
Platini ka zgjeruar analizën e tij duke folur për ndryshimin e prioriteteve në futbollin modern. Ai dallon një hendek të thellë mes gjeneratës së tij dhe asaj aktuale, ku vlerat kanë pësuar një ndryshim rrënjësor.
“Sot, Topi i Artë është Graali i Shenjtë, jo një listë e arritjeve të një lojtari. Ne kishim vlera të ndryshme. Ne luanim për ekipin dhe tifozët,” ka theksuar ai, duke e krahasuar me brezin e ri. “Sot, ata thonë: ‘Dua të bëj histori’. Ata nuk janë të lidhur me klubet apo tifozët. Futbolli profesional tani ka të bëjë me markat dhe mercenarët, asgjë tjetër,” përfundoi Platini.
Vëzhgimet e Platinit mbi futbollin modern dhe sfidat e shëndetit mendor të lojtarëve pritet të gjenerojnë debate të shumta mes tifozëve dhe analistëve të sportit.
