Kryetari i Prishtinës, Përparim Rama, ka deklaruar hapur synimin e tij për të marrë drejtimin e Kosovës si kryeministër. Gjatë një interviste të dhënë për një krijues përmbajtjeje në Shtetet e Bashkuara të Amerikës, Rama ka diskutuar si rreth detyrës aktuale si kryetar i kryeqytetit, ashtu edhe aspiratat e tij politike për të ardhmen.
Duke u fokusuar te puna e tij në Prishtinë, ai theksoi përkushtimin ndaj qytetarëve dhe vizionin e tij të qartë për zhvillimin e Kosovës. “Pjesa më e rëndësishme e punës sime është misioni im i radhës, të bëhem kryeministër, që të mund të pastroj dhe rregulloj shtetin,” u shpreh Rama, duke nënvizuar qartë objektivin e tij kryesor.
Në kuadër të intervistës, Rama iu referua edhe punës së kryeministrit aktual, Albin Kurti. Ai shprehu kritika ndaj qeverisjes aktuale, duke sugjeruar se është koha për ndryshim në krye të ekzekutivit. Me një ton të sigurt, kryetari i Prishtinës deklaroi gatishmërinë e tij për të marrë përgjegjësinë e udhëheqjes së vendit drejt një të ardhmeje më të suksesshme.
