Industria e mbrojtjes dhe liderët e Aleancës së Atlantikut të Veriut janë mbledhur në Ankara për Forumin e Industrisë së Mbrojtjes të NATO-s, një nga aktivitetet kryesore të Samitit të NATO-s 2026.
Forumi ka sjellë së bashku zyrtarë të lartë të NATO-s, përfaqësues të vendeve aleate dhe partnere, si dhe drejtues të kompanive të sektorit të mbrojtjes dhe inovacionit teknologjik.
Diskutimet kryesore janë përqendruar në forcimin e industrisë së mbrojtjes, rritjen e prodhimit ushtarak dhe përshpejtimin e bashkëpunimit mes vendeve aleate. Një nga temat kryesore është edhe zbatimi i planit të NATO-s për rritjen e investimeve në mbrojtje deri në 5 për qind.
Gjatë forumit pritet të prezantohen edhe marrëveshje dhe iniciativa të reja mes shteteve dhe industrisë së mbrojtjes, me synim krijimin e kapaciteteve më të avancuara dhe rritjen e furnizimeve të përbashkëta ushtarake.
Në agjendë janë përfshirë tema si mbrojtja ajrore dhe raketore, teknologjitë hapësinore, kapacitetet goditëse, inovacioni ushtarak dhe bashkëpunimi afatgjatë mes NATO-s dhe sektorit privat.
Takimi në Ankara shihet si një hap i rëndësishëm për forcimin e bazës industriale të Aleancës dhe për përballimin e sfidave të reja të sigurisë në hapësirën euroatlantike.
Prishtina Post – lajme të shpejta dhe të sakta.
