Gazetari i njohur Milaim Zeka ka ndarë emocionet e tij të thella të shkaktuara nga vendimi i fundit i Gjykatës Speciale në Hagë, i cili dënoi ish-krerët e Ushtrisë Çlirimtare të Kosovës (UÇK). Në një lidhje të drejtpërdrejtë për emisionin “Shqipëria Live”, Zeka foli jo vetëm për implikimet politike, por edhe për ndikimin personal të këtij vendimi, duke u fokusuar veçanërisht te reagimet e vajzave të tij.
Zeka rrëfeu se vajza e tij më e madhe kishte shprehur dëshirën për t’iu bashkuar protestave kundër vendimit, ndërsa vajza më e vogël, vetëm 10 vjeçe, i kishte drejtuar pyetje shqetësuese. “Babi, sa vjeç është Hashim Thaçi? A ka rrezik të vdesë në burg?”, pyeti ajo, duke nxjerrë në pah shqetësimin e gazetarit për pasojat që ky vendim mund të ketë te brezat e rinj.
Gazetari shprehu gjithashtu shqetësim për moshën e të dënuarve, duke përmendur konkretisht Jakup Krasniqin. Ai e cilësoi si të papranueshme që figura të tilla të përballen me një fat të tillë në moshë të avancuar. “E imagjinon bacin Jakup 75 vjeç, të gjithë këta?”, tha ai.
Më tej, Zeka vuri në dukje se sipas tij, zgjidhja e vetme nuk qëndron te protestat në rrugë, por te veprimi i Kuvendit të Republikës së Kosovës. “Nëse nuk mblidhen deputetët e Kuvendit të Republikës së Kosovës dhe nuk e vendosin nën kontroll këtë gjykatë raciste, puro raciste, kot dalim nëpër rrugë”, theksoi ai, duke shtuar se shqetësimi kryesor për të mbetet mirëqenia dhe e ardhmja e fëmijëve të tyre.
