Influencuesja australiane Elle Ferguson është kthyer në qendër të vëmendjes në rrjetet sociale pas një deklarate që ka shkaktuar reagime të shumta mes ndjekësve të saj.
E njohur për stilin luksoz të jetesës dhe postimet glamuroze, Ferguson publikoi një video gjatë një vizite në një butik të Louis Vuitton, ku shfaqej duke mbajtur një kuti bizhuterish në formë guaske me vlerë rreth 23,600 dollarë.
Aksesori luksoz, i dekoruar me monogramin karakteristik të markës dhe detaje ari, tërhoqi menjëherë vëmendjen e përdoruesve, por ajo që nxiti më shumë debat ishte përshkrimi që influencuesja vendosi krahas videos.
“Sapo pashë dikë nga shkolla e mesme që postoi një foto të tre fëmijëve me mbishkrimin: ‘Çfarë mund të jetë më mirë se kjo?’ Me gjithë respektin e duhur, një kuti bizhuterish Louis Vuitton me vlerë 23,600 dollarë”, shkroi ajo.
Më pas, Ferguson shtoi edhe frazën: “Merreni këtë me humor”.
Megjithatë, postimi u prit me reagime të përziera. Shumë komentues e kritikuan influencuesen, duke e cilësuar deklaratën si të tepruar dhe pa ndjeshmëri.
“Asgjë nuk krahasohet me fëmijët”, “Shpresoj të jetë shaka” dhe “Një kuti nuk do të të thotë kurrë ‘mami, të dua’”, ishin disa nga komentet që pushtuan rrjetin.
Nga ana tjetër, pati edhe ndjekës që e mbrojtën Ferguson, duke argumentuar se deklarata ishte një formë humori ironik dhe nuk duhej marrë seriozisht.
Disa prindër madje iu bashkuan debatit me komente me nota humori, duke e kthyer postimin në një moment viral që po vazhdon të qarkullojë gjerësisht në rrjetet sociale.
