Kuvendi i Kosovës ka miratuar ndryshimet në Ligjin për Dhomat e Specializuara, një hap kyç pas dënimeve të ish-udhëheqësve të UÇK-së për krime lufte. Megjithatë, procesi ligjor nuk mbyllet me këtë votim.
Presidentja e Kosovës, Vjosa Osmani, ka tetë ditë kohë për të nënshkruar dhe shpallur ligjin. Nëse afati kalon pa veprim, ligji do të hyjë në fuqi automatikisht dhe do të publikohet në Gazetën Zyrtare.
Profesori i Drejtësisë, Flamur Hyseni, thekson se përmbajtja përfundimtare e ligjit do të jetë e qartë vetëm pas publikimit. Ai nënvizon rëndësinë e përputhshmërisë së ndryshimeve me Kushtetutën dhe detyrimet ndërkombëtare.
Instituti i Kosovës për Drejtësi (IKD) vlerëson se ndryshimet ligjore mund të kontestohen në Gjykatën Kushtetuese nga palë të autorizuara, duke përfshirë deputetë dhe Avokatin e Popullit. Kjo për shkak se ndryshimet prekin juridiksionin dhe procedurat e Dhomave të Specializuara, duke u bazuar në nenin 162 të Kushtetutës që u jep atyre status të veçantë.
Ligji i ri parasheh kufizimin e mandatit të Gjykatës në Hagë, transferimin e rasteve në Kosovë, si dhe mundësinë e vuajtjes së dënimeve dhe faljes presidenciale brenda vendit.
Hyseni sqaron se miratimi i ligjit nuk nënkupton zbatimin e tij të menjëhershëm në procedurat gjyqësore. Po kështu, Shala nga IKD shtron se ligji, edhe pasi të shpallet, nuk e obligon Dhomën e Specializuar për zbatim të menjëhershëm, pasi çdo transferim kërkon procedura të qarta dhe bashkëpunim institucional.
Efektet juridike të ligjit do të jenë të vlefshme vetëm pas shpalljes në Gazetën Zyrtare. Çdo përfundim për efektet konkrete do të ishte i parakohshëm deri në njohjen e përmbajtjes përfundimtare. IKD vlerëson gjithashtu se hyrja në fuqi e ligjit të ri nuk anulon automatikisht vendimet e marra nga Dhomat e Specializuara, edhe pse synon zbatimin e dispozitave të caktuara, ato nuk do të kenë pasoja ndaj vendimeve të formës së prerë.
