Komisioni Qendror i Zgjedhjeve (KQZ) fillon sot fazën vendimtare të procesit zgjedhor, duke hapur kutitë me votat e diasporës dhe votat me kusht. Ky hap vjen pas përfundimit të numërimit të mbi 97% të votave të rregullta nga zgjedhjet parlamentare të fundit.
Kryesuesi i KQZ-së, Kreshnik Radoniqi, ka theksuar se rezultatet përfundimtare të zgjedhjeve nuk mund të shpallen pa u numëruar të gjitha kategoritë e votave. Procesi i numërimit për votat e diasporës, votat me postë, ato nga përfaqësitë diplomatike, si dhe votat me kusht dhe ato të personave me nevoja të veçanta, do të zhvillohet në Qendrat Komunale të Numërimit.
“Rezultati përfundimtar do të jepet pasi të numërohen votat e diasporës, ato me postë dhe ato në përfaqësi diplomatike, po ashtu votat me kusht dhe ato të personave me nevoja të veçanta”, ka deklaruar Radoniqi.
Dinamika e fillimit të numërimit do të ndryshojë sipas komunave. Në shumicën prej tyre, procesi pritet të nisë në orën 16:00, ndërsa në komunat më të vogla, numërimi do të fillojë që nga ora 09:00 e mëngjesit. Sipas Radoniqit, vonesat në disa komuna janë për shkak të nevojës për grumbullimin dhe sistemimin e materialit zgjedhor gjatë natës, si dhe për t’u mundësuar pushim ekipeve të angazhuara.
Numërimi i këtyre votave shihet si hapi i fundit para certifikimit të rezultateve, të cilat do të përcaktojnë përbërjen e re të Kuvendit të Kosovës.
