Këngëtarja me famë botërore, Dua Lipa, ka nisur një betejë ligjore kundër gjigantit teknologjik Samsung, duke kërkuar dëmshpërblim prej 15 milionë dollarësh. Ylli i muzikës pop pretendon se kompania koreano-jugore ka përdorur imazhin e saj në mënyrë të paligjshme në paketimet e produkteve të tyre, duke shkaktuar dëme të konsiderueshme financiare.
Padia, e cila është depozituar në Gjykatën e Kalifornisë, pretendon se Samsung ka shfrytëzuar një fotografi të Lipës, realizuar gjatë performancës së saj në festivalin “Austin City Limits”, për fushatën e saj promovuese pa marrë paraprakisht pëlqimin e nevojshëm nga artistja apo menaxhmenti i saj. Ky imazh është shfaqur në kutitë e televizorëve që nga viti i kaluar.
Sipas dokumenteve gjyqësore, ekipi i Dua Lipës ka tentuar të kontaktojë Samsung për të kërkuar tërheqjen e imazhit, por kërkesa e tyre është refuzuar nga kompania. Ky refuzim ka shtyrë këngëtaren të marrë hapat ligjorë për të mbrojtur të drejtat e saj.
Për të mbështetur pretendimet për përfitime materiale nga ky përdorim i paautorizuar, në padi janë përfshirë dëshmi nga platforma X (e njohur më parë si Twitter), ku blerësit kanë pranuar se janë ndikuar nga prania e Dua Lipës në paketim për të blerë produktin. Ekipi ligjor i Lipës thekson se ajo ka ndërtuar një imazh “premium” në treg dhe çdo shfrytëzim i pakompromis i imazhit të saj përbën një shkelje serioze të të drejtave tregtare dhe atyre personale.
Çështja tani është në duart e drejtësisë amerikane, e cila do të vendosë për fatin e kësaj padie milionëshe.
