Ish-banorja e njohur e “Big Brother VIP Albania”, Dea Mishel, ka hedhur dritë mbi arsyet që ajo beson se qëndrojnë pas kritikave dhe sulmeve masive që i janë drejtuar në emisionin “Top Story”. Në një reagim të publikuar në rrjetet sociale, Dea sugjeron se refuzimi i saj për të marrë pjesë në programin e drejtuar nga Grida Duma mund të jetë shkaku kryesor.
Ajo shprehet në mesazhin e saj në Instagram: “Do ishte më e ndershme ta shprehnit haptazi se ju ka hidhëruar refuzimi im për ftesën tuaj, ndaj po shikoj këto klipe sot.” Ky pohim lë të kuptohet se Dea dyshon që komentet negative dhe kritikat e bëra në studio nuk kanë qenë të rastësishme, por një pasojë e drejtpërdrejtë e vendimit të saj për të mos pranuar ftesën e “Top Story” në Top Channel.
Më tej, Dea Mishel shprehu zhgënjimin e saj për faktin se, sipas saj, pikërisht momenti ku ajo ishte në shënjestër të kritikave dhe ofendimeve është zgjedhur për t’u promovuar në rrjetet sociale nga emisioni. Deri më tani, nuk ka pasur ende asnjë koment apo reagim publik nga ana e moderatores Grida Duma lidhur me akuzat e Deas.
