Seanca konstituive e Legjislaturës së XI të Kuvendit të Kosovës do të mbahet sot në orën 11:00, me rend dite zgjedhjen e organeve të larta drejtuese. Sipas informacioneve, Lëvizja Vetëvendosje pritet të nominojë deputeten Albulena Haxhiu për postin e Kryetares së Kuvendit.
Nga ana tjetër, Partia Demokratike e Kosovës (PDK) pritet të nominojë Vlora Çitakun për nënkryetare, ndërsa Lidhja Demokratike e Kosovës (LDK) ende nuk ka zyrtarizuar kandidaturën e saj për këtë pozitë, duke paralajmëruar pjesëmarrjen në seancë.
Zhvillimi i procesit të votimit dhe qëndrimi i subjekteve politike, përfshirë PDK-në, LDK-në dhe partitë e tjera ndaj kandidaturës së Albulena Haxhiut, pritet të sqarohet gjatë zhvillimit të seancës.
Kjo seancë vjen pas asaj të 6 gushtit 2026, e cila nuk arriti të finalizohej. Atëbotë, deputetët kishin dhënë betimin, por procesi mbeti pezull pasi Lëvizja Vetëvendosje, si fituese e zgjedhjeve, nuk prezantoi kandidatin për Kryeparlamentar.
