UEFA ka marrë një hap të paprecedentë duke përgatitur një padi penale kundër Presidentit të FIFA-s, Gianni Infantino, duke ngritur akuza për keqmenaxhim financiar. Kjo lëvizje, që synon të shqyrtohet në gjykatat zvicerane, lidhet me një plan ambicioz por të dështuar të Infantino për të shitur të ardhurat e ardhshme nga Kupa e Botës te investitorë privatë.
Sipas njoftimeve më të fundit, UEFA ka dorëzuar dokumentacion në një gjykatë të Manhattan, duke kërkuar qasje në prova nga Thrive Capital Management, një fond investimesh me bazë në Nju Jork. Thrive Capital, i themeluar nga Joshua Kushner, dhëndri i ish-Presidentit amerikan Donald Trump, ishte parashikuar të ishte investitori kryesor, duke ofruar 4.2 miliardë dollarë për 20% të aksioneve në një njësi të re të FIFA-s, e cila do të menaxhonte komercialisht ngjarjet kryesore të futbollit.
Avokatët e UEFA-s po shqyrtojnë mundësinë e nisjes së procedurave penale në Zvicër kundër Infantino dhe zyrtarëve të tjerë të FIFA-s, bazuar në nenin 158 të Kodit Penal Zviceran. Një dokument i detajuar prej 56 faqesh, i siguruar nga Associated Press, sugjeron se shifra e propozuar prej 4.2 miliardë dollarësh mund të jetë një “çmim mashtrues jashtë tregut, i promovuar nga Infantino për përfitim personal”. Ky marrëveshje u anulua më 1 gusht, pas kundërshtimeve të forta nga liderët e futbollit global, përfshirë UEFA-n.
