Një turistja nga Filipinet, Kennie Anne Alindogan, ka përjetuar një moment të jashtëzakonshëm dhe plot humor gjatë vizitës së saj në Shkup, Maqedoni e Veriut. Vetëm pak minuta pasi kishte zbritur nga autobusi, Alindogan u gjend papritur pjesë e një kolone festive të një dasme shqiptare, një ngjarje që ajo e ndau me pasuesit e saj në rrjetet sociale duke e cilësuar si një aventurë të papritur.
“Zbrita nga autobusi dhe pesë minuta më vonë, pa e kuptuar, u bëra pjesë e kolonës së dasmës,” shprehet Alindogan, duke theksuar habinë e saj për këtë rastësi.
Edhe pse pa i njohur askënd, ajo vendosi të pranojë ftesën për t’u bashkuar me festën. Me një dozë humori, ajo përshkroi momentin duke thënë: “Nuk e dija kush ishin ata njerëz, por kur më thanë të hipja në makinë, mendova: ‘Epo… ose kjo do të jetë fillimi i një historie fantastike, ose i një dokumentari të Netflix-it’.”
Përvoja e saj u kthye në një kujtim të paharrueshëm. Alindogan shprehu mirënjohjen e thellë për mikpritjen shqiptare, duke thënë: “Fatmirësisht, doli të ishte e para. Shqiptarët janë shumë të mrekullueshëm! Ju dua shumë.”
Për të shprehur më tej falënderimin, ajo iu drejtua komunitetit online, duke kërkuar ndihmë për të gjetur dy shqiptarët që e ftuan në dasmë. “Internet, bëje magjinë tënde dhe më ndihmo t’i gjej këta dy shqiptarë. Dua t’i falënderoj siç duhet për këtë kujtim kaq të bukur!” përfundoi ajo, duke lënë publikun të emocionuar dhe kurioz për këtë histori unike të mikpritjes shqiptare.
