Një incident dramatik në Alpet Shqiptare ka tërhequr vëmendjen e botës, pasi një turiste australiane, Amy Lecons, u kafshua nga një nepërkë me brirë gjatë një vrapimi në zonën e Valbonës. Ngjarja e rrezikshme u dokumentua nga vetë turistja, e cila ndodhej në një shteg malor rreth 90 minuta larg zonave të banuara.
Menjëherë pas kafshimit, Lecons arriti të kontaktonte babain e saj, një mjek në Australi, duke përdorur telefonin celular. Ai e udhëzoi me këshilla të para mjekësore dhe e ndihmoi atë të përcaktonte vendndodhjen e saktë. Përballë vështirësive komunikuese për shkak të barrierës gjuhësore me shërbimet emergjente lokale, u mobilizua një operacion shpëtimi.
Një banor i zonës tregoi heronizëm duke e mbartur turisten në krahë nëpër terrenin e vështirë malor, duke e afruar drejt ndihmës së nevojshme. Pas shpëtimit, Amy Lecons u dërgua në spital ku kaloi dy ditë dhe mori trajtimin me kundërhelm. Historia e saj mori një jehonë të jashtëzakonshme në internet, me videon e postuar në TikTok që ka grumbulluar mbi 21 milionë shikime.
Turistja australiane shprehu mirënjohjen e saj të thellë për shqiptarët që i ofruan ndihmë në momentet kritike, duke vlerësuar lart mikpritjen dhe gatishmërinë e tyre për ta ndihmuar në një situatë emergjente.
