Një ngjarje e rëndë ka tronditur familjen Zubaku nga Topanica e Kamenicës, pas humbjes së dy motrave të reja, E. dhe A., të cilat humbën jetën në një aksident automobilistik në Gjermani. Viktima, 23 dhe 17 vjeç, ishin në kulmin e jetës së tyre dhe kishin plane të shumta për të ardhmen.
Babai i vajzave, i prekur thellë nga humbja, ka rrëfyer me lot në sy dhimbjen e madhe që ka përfshirë familjen. “Jemi të gjithë të shkatërruar. Zemra ime është e thyer. Të dyja ishin në kulmin e jetës së tyre,” ka thënë ai, duke shtuar se vajzat do të varrosen në vendlindje.
Sipas raportimeve, motra më e madhe kishte përfunduar studimet profesionale dhe punonte në Olten të Zvicrës, ndërsa motra më e vogël ishte në vitin e dytë të përgatitjes profesionale. “Ato ishin në kulmin e jetës së tyre dhe e donin jetën. Fatkeqësisht, ishte shumë e shkurtër për to, na mungojnë shumë,” u shpreh ai për mediat zvicerane.
Aksidenti tragjik ndodhi më 20 qershor, pak pas orës 11:30, pranë zonës së pushimit Renchtal. Një përplasje anësore mes dy veturave, shkaktuar nga shpejtësia e lartë dhe humbja e kontrollit, krijoi probleme në qarkullim. Kjo solli një tjetër aksident me pesë automjete të përfshira pranë daljes së Appenweier.
Ndërsa pasagjerët e katër automjeteve të tjera nuk pësuan lëndime, dy gratë që udhëtonin në një automjet tip Smart humbën jetën në vendngjarje për shkak të plagëve të rënda. Policia e Offenburgut konfirmoi se viktimat ishin shtetase zvicerane dhe automjeti i tyre ishte i regjistruar në Zvicër. Dëmi material i shkaktuar nga të dy aksidentet vlerësohet të jetë mbi 100 mijë euro.
