Spanja po përballet me një situatë alarmante pasi Zyra Meteorologjike Spanjolle (AEMET) ka shpallur alarm të kuq për një valë të nxehtë e cila pritet të zgjasë të paktën deri të dielën. Paralajmërimi bie mbi rajonet jugperëndimore, qendrore dhe Ishujt Kanarie.
Një zonë e konsiderueshme e presionit të lartë atmosferik do të forcohet, duke sjellë rritje ditë pas dite të temperaturave nën qiellin pa re. Sipas raportimeve, temperaturat do të luhaten mes 39 dhe 41 gradë Celsius deri të mërkurën, me parashikime për rritje të mëtejshme gjatë javës.
Luginat e Guadalquivir, Guadiana dhe Ebro do të regjistrojnë temperatura mbi 40 gradë Celsius për disa ditë radhazi. Dita e premte pritet të jetë kulmi i nxehtësisë, me qytetin e Kordobës që parashikohet të arrijë shifrën rekord prej 44 gradë Celsius. Ndërkohë, qytete si Toledo, Zaragoza dhe Ciudad Real mund të përjetojnë temperatura rreth 42 gradë Celsius.
