Vetëm dy javë larg finales së madhe të ‘Ferma VIP 3’, atmosfera brenda fermës është ndezur nga konkurrenca e fortë dhe aspiratat e shumta për fitore. Megjithatë, një zhvillim i papritur ka tronditur banorët dhe publikun pak minuta para nisjes së spektaklit të fundit.
Moderatorja Arbana Osmani ka komunikuar vendimin e Agait për të përjashtuar nga gara fermerin Sorgini. Arsyeja e këtij vendimi drastik, sipas Osmanit, është shkelja e rregullave të formatit: Sorgini akuzohet se ka kërkuar informacione nga jashtë fermës, një veprim i ndaluar në mënyrë kategorike.
Ndërsa Sorgini nuk ishte i pranishëm për të dhënë sqarime, banorët e tjerë shprehën habinë dhe keqardhjen e tyre për largimin e tij. Pavarësisht zhgënjimit, ata i kanë uruar fat Sorginit në rrugëtimin e tij të ardhshëm pas daljes nga ‘Ferma VIP 3’. Ky përjashtim i papritur padyshim që do të shtojë edhe më shumë dramën dhe misterin në javët e fundit të këtij sezoni.
