Shtetet e Bashkuara të Amerikës kanë vendosur sanksione ndaj gjyqtarit francez Nicolas Yann Guillou, i cili ka pasur një rol kyç në procedurën paraprake të rastit të ish-presidentit të Kosovës, Hashim Thaçi, në Gjykatën Speciale në Hagë.
Në një deklaratë të Departamentit Amerikan të Shtetit thuhet se Guillou ka autorizuar lëshimin e urdhër-arresteve ndërkombëtare për kryeministrin e Izraelit, Benjamin Netanyahu, dhe ish-ministrin e Mbrojtjes, Yoav Gallant, për akuza që lidhen me krime lufte.
Ky vendim i gjyqtarit ka ngjallur reagimin e ashpër të administratës amerikane, e cila menjëherë ka vendosur sanksione ndaj tij.
Përveç Guillou, SHBA ka sanksionuar edhe tre figura të tjera të Gjykatës Ndërkombëtare Penale: Kimberly Prost, Nazhat Shameem Khan dhe Mame Mandiaye Niang.
Nicolas Guillou u emërua gjykatës në Gjykatën Speciale më 7 shkurt 2017 dhe ka kryer funksionin e gjykatësit të procedurës paraprake në çështjet gjyqësore të Hysni Gucatit dhe Nasim Haradinajt, Salih Mustafës, rastin e Hashim Thaçit dhe të bashkakuzuarve, Pjetër Shalës, si dhe të Sabit Januzit e Ismet Bahtijarit.
Ai ishte caktuar gjithashtu në funksionin e gjykatësit të vetëm në çështjen kundër Isni Kilajt.
Biografia e Nicolas Guillou
Gjykatësi Nicolas Guillou (Francë) ka shërbyer si shef i kabinetit të kryetarit të Tribunalit Special për Libanin (2015-2019).
Që nga vitit 2012, ai u emërua prokuror ndërlidhës i Francës në Departamentin e Drejtësisë së Shteteve të Bashkuara të Amerikës, ku ndihmoi në bashkëpunimin gjyqësor midis dy vendeve për çështje penale dhe civile, veçanërisht për kundër-terrorizmin, praktikat e korrupsionit në vende të huaja dhe krimin kibernetik.
Gjatë periudhës 2006-2012, gjykatësi Nicolas Guillou shërbeu në poste të ndryshme në Ministrinë e Drejtësisë të Francës si zëvendëskreu i seksionit për të drejtën tregtare, këshilltar për çështje penale dhe këshilltar për çështje diplomatike.
Nga viti 2003 deri më 2006, Guillou punoi si gjykatës hetimor në gjykatën e Meaux, afër Parisit, ku trajtoi çështje të ndryshme penale si vrasje të qëllimshme, krimin e organizuar dhe krimin financiar.
Gjykatësi Nicolas Guillou ka magjistruar në të drejtën penale ndërkombëtare dhe europiane të Universitetit të Sorbonës (Francë).
