Një debat i ndezur mbi bukurinë femërore ka sjellë në qendër të vëmendjes gratë ruse, duke i vendosur ato në krye të një renditjeje globale për estetikë. Në emisionin televiziv “Ftesë në 5”, stilisti Ardi Borova, gazetari Misha Pumo dhe agjentja imobiliare Oksana Subashi diskutuan faktorët kulturorë dhe modës që ndikojnë në perceptimin e bukurisë.
Sipas renditjes së diskutuar, Rusia kryeson listën, e ndjekur nga Suedia dhe Ukraina. Në këtë listë globale të cilësuar si ‘koncept i shumëanshëm’, përfshiheshin gjithashtu Polonia, Kolumbia, Brazili, Çekia, Meksika dhe Italia.
Stilisti Ardi Borova shprehu shqetësimin për mungesën e Shqipërisë në këtë klasifikim, duke theksuar se gratë shqiptare meritojnë të jenë pranë atyre ukrainase, jo vetëm për pamjen, por edhe për cilësitë shpirtërore.
Gazetari Misha Pumo, me eksperiencën e tij të gjatë në Rusi, përshkroi gratë sllave si gra të dalluara për elegancën dhe vëmendjen ndaj kujdesit personal. Ai theksoi se bukuria është subjektive, por kujdesi për veten përmes aktiviteteve fizike dhe sporteve është një element kyç. Megjithatë, Pumo vuri në dukje tendencën e rritur drejt përdorimit të kozmetikës dhe operacioneve plastike, të cilat, sipas tij, po bëjnë që gratë të ngjajnë më shumë me njëra-tjetrën. Ai përmendi se në Rusi, ky përdorim ndonjëherë është në tepricë, duke e kthyer bukurinë në një temë diskutimi.
Duke reflektuar mbi ndryshimet në standardet estetike, Pumo kujtoi se në vitet ’90 mbizotëronte bukuria natyrale, ndërsa sot shumë gra preferojnë të ndryshojnë pamjen me ngjyra flokësh dhe makiazh, duke treguar evolucionin e modës dhe estetikës.
Nga ana tjetër, Oksana Subashi foli për kulturën e kujdesit ndaj vetes në Ukrainë, duke theksuar se gratë ukrainase kujdesen për trupin e tyre për vete, si një zgjedhje personale e pavarur nga statusi apo mosha.
Pumo gjithashtu hodhi poshtë stereotipet për rusët dhe ukrainasit si njerëz të ftohtë, duke i përshkruar si individë të ndjeshëm, që vlerësojnë zhvillimin mendor dhe kulturor. Ai shtoi se bisedat me gratë sllave shpesh fillojnë me tema arti dhe kulture, duke treguar një hapje dhe thellësi në komunikim.
