Instituti Hidrometeorologjik i Kosovës (IHMK) ka lëshuar një paralajmërim meteorologjik të nivelit portokalli për të gjithë territorin e vendit, duke parashikuar stuhi të fuqishme për ditën e mërkurë.
Sipas IHMK-së, reshjet intensive me bubullima, breshër dhe erëra të forta me karakter stuhish priten të jenë prezente gjatë gjithë ditës, nga mesnata deri në orën 23:59.
Zhvillimet e fuqishme konvektive, sipas institutit, mund të sjellin rreziqe të konsiderueshme për qytetarët dhe infrastrukturën.
Sponsorizuar
Prishtinë → Stuttgart
Prishtinë → München
Prishtinë → Göteborg
nga 99€75€69€
Mes pasojave të mundshme të theksuara nga IHMK janë:
- Goditjet e rrufesë, duke rrezikuar njerëzit dhe kafshët.
- Dëmtimet në rrjetin elektroenergjetik dhe ndërprerjet e furnizimit me energji elektrike.
- Pengesa në sistemet e telekomunikacionit.
- Përmbytje të shpejta lokale në zonat me reshje të dendura.
- Dëmtimi i objekteve, automjeteve, infrastrukturës dhe kulturave bujqësore nga breshëri dhe erërat e forta.
Gjithashtu, IHMK paralajmëron se shkarkimet atmosferike mund të rrisin dukshëm rrezikun e shpërthimit të zjarreve.
Qytetarët u bëhen thirrje të:
- Shmangin qëndrimin në ambiente të hapura gjatë stuhive.
- Mos strehohen nën pemë të vetmuara, pranë shtyllave elektrike apo objekteve metalike.
- Mbrojnë automjetet dhe pronën nga breshëri dhe erërat e forta.
- Tregojnë kujdes të shtuar në komunikacion për shkak të dukshmërisë së reduktuar dhe rrugëve të rrëshqitshme.
