Ish-opinionistja e njohur e formatit Big Brother VIP Albania 5, Monika Kryemadhi, ka bërë deklarata mjaft tërheqëse në lidhje me raportet e saj me ish-banorët, duke u fokusuar veçanërisht te çifti i formuar brenda shtëpisë, Brikena dhe Mateo.
E ftuar në emisionin “She’s On Top”, Kryemadhi ndau detaje rreth marrëdhënieve që ka ruajtur me banorët pas përfundimit të spektaklit. Komentet e saj për Brikenën dhe Mateon kanë nxitur kureshtje të madhe tek publiku.
Ajo tregoi se është takuar me Brikenën pas daljes nga shtëpia dhe nuk ngurroi të shprehë vlerësimin e saj për të. Sipas Monikës, Brikena ka përballuar një kosto personale për shkak të lidhjes me Mateon, edhe pse nuk dha sqarime të mëtejshme mbi këtë pohim.
“Brikena më pëlqen. Mateo nuk më pëlqen më shumë se Brikena. Brikena mori një kosto në lidhjen e saj me Mateon. Shpresoj që lidhja e tyre të jetë sa më e gjatë”, deklaroi ajo.
Këto deklarata kanë shkaktuar menjëherë debate dhe spekulime në rrjetet sociale, ku ndjekësit po diskutojnë për situatën aktuale të çiftit dhe sfidat me të cilat ata mund të jenë përballur pas përfundimit të reality show-t.
Gjatë intervistës, Monika foli edhe për raportet me ish-banorë të tjerë. Ajo bëri të ditur se vazhdon të ketë kontakte me Rogertin dhe Gretën nëpërmjet rrjeteve sociale, duke theksuar se Rogerti është krejtësisht ndryshe nga imazhi publik. Sipas saj, ai ka shfaqur një anë më të fortë të karakterit për t’iu përshtatur dinamikave të lojës.
Kryemadhi zbuloi gjithashtu se ka ruajtur komunikim edhe me Selin, ndërsa së fundmi është takuar me Gretën dhe Onon, duke shprehur përshtypje pozitive për transformimin dhe paraqitjen e tyre pas përfundimit të spektaklit.
