Ministri i Financave, Punës dhe Transfereve, Hekuran Murati, ka dhënë detaje të reja lidhur me ekzekutimin e masave mbështetëse nga Paketa për Përballje me Inflacionin 2.0. Sipas një postimi të tij në Facebook, pagesa prej 100 euro për punëtorët e sektorit privat pritet të fillojë të hënën e javës së ardhshme.
Komisionet vlerësuese kanë nisur punën në fillim të kësaj jave për shqyrtimin e aplikimeve për dy masa kyçe: mbështetjen për punëtorët e sektorit privat dhe mbështetjen për studentët. Puna për masën e sektorit privat është në fazën përfundimtare, duke lënë të kuptohet se ekzekutimi i pagesave do të bëhet siç është paralajmëruar, në fillim të javës së ardhshme.
Sa i përket masës për studentët, Ministri Murati ka sqaruar se komisioni do ta përfundojë punën sapo të marrë konfirmimet e nevojshme nga institucionet e arsimit të lartë për studentët që kanë aplikuar. Ai ka premtuar se publiku do të njoftohet në kohë për gatishmërinë e listave për pagesa.
Qeveria vazhdon përkushtimin për mbështetjen e të gjithë qytetarëve, duke u kujdesur për nevojat financiare në periudhën aktuale.
