Një ceremoni e mbushur me emocione u mbajt sot në qytetin e Sllavonski Brod, Kroaci, ku u zbulua një pllakë përkujtimore për nder të dhjetë viktimave të humura tragjikisht në një aksident rrugor më 25 korrik 2021. Kjo iniciativë, e organizuar nën përkujdesjen e Ambasadës së Republikës së Kosovës në Kroaci, mblodhi familjarët e viktimave për të nderuar kujtimin e tyre.
Mes viktimave të kësaj ngjarjeje të rëndë ishin edhe nëna dhe motra e Elijonës, ish-konkurrentes së Big Brother VIP Kosova. Pamjet e publikuara nga Ambasada e Kosovës në Zagreb shfaqin momente prekëse dhimbjeje dhe homazhesh pranë pllakës së re. Një fotografi e shpërndarë gjerësisht në rrjetet sociale tregon Elijona duke përqafuar vëllain e saj pranë pllakës përkujtimore, një simbol i fortë i mallit dhe kujtimit për familjarët e humbur.
Pllaka përkujtimore shërben si një monument i përjetshëm për dhjetë jetët që u ndërprenë papritur, duke rikthyer emocionet dhe kujtimet e dhimbshme të një prej tragjedive më të mëdha që preku familjet kosovare.
