Kryeministri në detyrë i Kosovës, Albin Kurti, ka vënë në dukje se rritja e kapaciteteve ushtarake të Serbisë nuk është thjesht një modernizim i brendshëm, por pjesë e një strategjie më të gjerë politike dhe diplomatike. Sipas Kurtit, kjo strategji lidhet drejtpërdrejt me aspiratat hegjemoniste të Beogradit në rajon, me theks të veçantë ndaj Kosovës.
Duke folur në Konferencën e 9-të të Ambasadorëve të Republikës së Kosovës, të mbajtur në Prishtinë me temën “Kosova në një botë në ndryshim: Siguri, Partneritet dhe Zhvillim”, Kurti theksoi se zhvillimet gjeopolitike aktuale, përfshirë ndikimin rus në Ballkanin Perëndimor, kanë rritur ndjeshmërinë e sigurisë në rajon.
Ai shtoi se mjedisi ndërkombëtar është bërë më kompleks, duke kërkuar nga ambasadorët angazhim më të thellë përtej marrëdhënieve tradicionale shtet me shtet. Ky angazhim, sipas tij, përfshin krijimin e kontakteve, ndërtimin e partneriteteve dhe hapjen e mundësive të reja për Kosovën.
Fluturim direkt – Prishtinë → Stuttgart
Nisje: çdo ditë
Fluturim direkt – Prishtinë → Munich
Nisje: çdo ditë
Fluturim direkt – Prishtinë → Goteburg
Nisje: çdo ditë
Duke iu referuar agresionit rus ndaj Ukrainës, Kurti tha se ky veprim ka ndryshuar perceptimet për paqen dhe stabilitetin në Evropë, duke nxjerrë në pah natyrën e re të konflikteve moderne, të cilat shtrihen përtej fushëbetejave tradicionale dhe përfshijnë hapësirën digjitale dhe kërcënimet hibride.
Kryeministri në detyrë nënvizoi gjithashtu rrezikun e dezinformimit dhe manipulimit të informacionit, duke theksuar nevojën që diplomatët të menaxhojnë informacionin, të luftojnë dezinformimin dhe të ruajnë besimin e publikut, duke ofruar informacione të mbështetura në fakte dhe duke u angazhuar në platformat digjitale.
Kurti përmendi se retorika e liderëve serbë dëshmon pretendime ekspansioniste të vazhdueshme, ndërsa Kosova po përqendrohet në forcimin e institucioneve demokratike, rritjen e kapaciteteve të sigurisë dhe thellimin e partneriteteve ndërkombëtare, veçanërisht me Shtetet e Bashkuara të Amerikës dhe NATO-n, si dhe me Shqipërinë dhe Kroacinë.
