Kryeministri Albin Kurti ka theksuar nevojën urgjente për drejtësi për personat e zhdukur gjatë luftës, duke i bërë thirrje komunitetit ndërkombëtar të ushtrojë presion mbi Serbinë.
Gjatë një vizite te familjet e Salih Mëziut dhe Idriz Rrecajt, veprimtarë të njohur të “Grupit të Intelektualëve”, të cilët u rrëmbyen dhe u zhdukën me dhunë nga forcat serbe në prill të vitit 1999, Kurti nënvizoi se Serbia vazhdon të mbyllë dhe klasifikojë dosjet e tyre, duke penguar zbardhjen e plotë të fatit të tyre.
“Vizita e sotme në Marinë dhe Llaushë, ku takuam familjet e Salih Mëziut dhe Idriz Rrecajt, është një hap i rëndësishëm për të njohur dhimbjen e tyre,” tha Kurti, duke shtuar se një pjesë e mbetjeve të tyre u gjetën në varrezat masive në Zubin Potok.
Kurti theksoi se, edhe pse familjet e Mëziut dhe Rrecajt, si dhe ajo e Adem Beqirit, tashmë kanë marrë përgjigje për fatin e të dashurve të tyre, kërkesa për drejtësi mbetet. Ai e cilësoi këtë si një detyrë të rëndësishme përballë dhimbjes së thellë të familjeve që ende presin për më shumë se 1500 persona të tjerë të zhdukur.
“Trysnia ndaj Serbisë është e nevojshme, pasi ajo ende mbron dhe glorifikon kriminelët, duke fshehur dhe mohuar krimet e kryera gjatë luftës,” përfundoi Kurti, duke kërkuar ndryshim nga kjo mentalitet që daton që nga vitet ’90.
