Kryeministri në detyrë, Albin Kurti, ka shprehur ngushëllime të sinqerta familjes së Laurent Krasniqit, ish-pjesëmarrësit të njohur të Big Brother VIP Kosova 3, i cili humbi jetën në një aksident të rëndë. Kryeministri Kurti vizitoi familjarët për të ofruar mbështetje dhe ngushëllim në këtë periudhë tejet të vështirë.
Fotografitë e shpërndara nga Zyra e Kryeministrit tregojnë momentet e dhimbjes dhe solidaritetit, ku Kryeministri shihet duke biseduar me familjarët e Laurentit. Laurent Krasniqi, një figurë e njohur në rrjetet sociale, u nda nga jeta më 2 shtator pas një aksidenti tragjik në fshatin Llukar të Prishtinës. Ky lajm i trishtë ka prekur thellë jo vetëm familjen dhe miqtë e tij, por edhe një numër të madh ndjekësish në platformat online.
Përcjellja për në banesën e fundit e Laurent Krasniqit u bë më 3 shtator, ku morën pjesë familjarë, miq dhe shumë adhurues të tij. Të pranishmit u mblodhën për të nderuar kujtimin e tij, duke dëshmuar respektin dhe lidhjen që kishin me të, qoftë nga afër apo përmes ekranit.
