Kim Kardashian, ylli i njohur televiziv dhe sipërmarrëse, ka nxitur diskutime të shumta mes fansave dhe publikut të gjerë pasi ka zbuluar detaje befasuese rreth regjimit të saj të përditshëm shëndetësor. Gjatë një interviste në podcastin “Good Hang”, ajo rrëfeu se konsumon një sasi të konsiderueshme suplementesh çdo ditë, duke arritur shifrën e 35 pilulave.
Kardashian diskutoi për kujdesin shëndetësor të grave pas moshës 40-vjeçare, duke përfshirë rëndësinë e vitaminave, analizave të rregullta të gjakut dhe densitetit kockor. Ajo pranoi se rutina e saj është intensive: “Marr ndoshta 35 suplemente në ditë. I ndaj në tri doza…” duke shtuar se në një moment u lodh aq shumë nga sasia e madhe e pilulave, saqë vendosi të ndërpriste vajin e peshkut (fish oil).
Megjithatë, rezultatet e analizave të gjakut e detyruan ta rifillonte. “Kur më dolën analizat, ishte e qartë që e kisha ndalur. Atëherë duhej ta rifilloja përsëri”, shpjegoi ajo. Kim theksoi rolin e vajit të peshkut, i pasur me omega-3, për shëndetin e zemrës, trurit, uljen e inflamacionit dhe përfitimet për lëkurën, sytë dhe nyjet.
Pavarësisht përfitimeve, Kardashian pranoi se kjo qasje e ngarkuar me suplemente i shkakton asaj atë që e quan “lodhje nga tabletat”. Ky rrëfim ka ringjallur debatin mbi balancën e shëndetshme mes nevojave për përkujdesje dhe varësisë nga suplementet në jetën moderne.
