Një ish-zyrtar i lartë i Google ka lëshuar një alarm të fortë lidhur me zhvillimin e pakontrolluar të inteligjencës artificiale (IA), duke parashikuar pasoja të rënda socio-ekonomike për shumicën e njerëzimit.
Dex Hunter-Torricke, ish-drejtori i komunikimit në DeepMind të Google, shprehu shqetësimin se IA mund të sjellë ndryshime rrënjësore në qytetërimin tonë, ku vetëm një pjesë e vogël e shoqërisë do të gëzojë begati, ndërsa shumica do të përballet me pasojat negative.
Në një ese të publikuar së fundmi, Hunter-Torricke theksoi: “Pas gati dy dekadash në dhomat e kompanive të mëdha të teknologjisë, kam arritur në përfundimin se nuk jemi të përgatitur për botën që po vjen.” Ai paralajmëroi se trajektorja aktuale drejt zhvillimit të IA “çon në katastrofë”, duke i bërë thirrje për reflektim urgjent atyre që merren me teknologjinë dhe politikëbërjen.
Hunter-Torricke identifikoi pabarazinë ekonomike dhe krizën klimatike si probleme globale që IA mund t’i përkeqësojë ndjeshëm, duke i bërë ato edhe më të vështira për t’u zgjidhur. Ai përmendi studime të Fondit Monetar Ndërkombëtar (FMN) që sugjerojnë se IA mund të automatizojë deri në 60% të vendeve të punës në mbarë botën, duke nxitur shqetësime të mëdha për ekonominë globale dhe stabilitetin social.
Ish-shefi i PR-it, i cili ka bashkëpunuar me personalitete si Eric Schmidt, Mark Zuckerberg dhe Elon Musk, vlerëson se udhëheqësit botërorë kanë vetëm një dekadë kohë për të rishikuar strategjitë e tyre ndaj IA, në mënyrë që të ndërtojnë një të ardhme më të qëndrueshme. Ai njoftoi gjithashtu themelimin e organizatës jofitimprurëse “Qendra për të Nesërmen”, e cila synon të kontribuojë në krijimin e një të ardhmeje më të mirë për njerëzimin. Këto vërejtje vijnë në një periudhë kur shumë ekspertë po ngrenë shqetësime për rreziqet potencialë të inteligjencës artificiale.
