Një studim i fundit ka hedhur dritë mbi lidhmërinë shqetësuese mes infeksioneve dhe rritjes së rasteve të kancerit në mbarë botën. Sipas të dhënave të publikuara në revistën prestigjioze ‘The Lancet Oncology’, pritet që deri në vitin 2027, rreth 2.3 milionë diagnoza të reja të kancerit të lidhen drejtpërdrejt me infeksione.
Ky hulumtim, i realizuar nga Agjencia Ndërkombëtare për Kërkimin e Kancerit, një agjenci e Organizatës Botërore të Shëndetësisë, tregon se infeksionet janë përgjegjëse për pothuajse një të tetën e të gjitha rasteve të kancerit në nivel global. Kjo statistikë alarmante nënvizon nevojën urgjente për masa parandaluese, veçanërisht vaksinimin.
Mes infeksioneve kryesore që kontribuojnë në këtë problematikë, dallohen bakteret si ‘Helicobacter pylori’, e lidhur me kancerin e stomakut, dhe virusi i papillomës njerëzore (HPV), i cili është shkaktar i formave të ndryshme të kancerit. Këta dy patogjenë përbëjnë shumicën e rasteve të kancerit të shkaktuara nga infeksionet, duke theksuar rëndësinë jetike të parandalimit.
Gjithashtu, viruset e tjerë si hepatiti B dhe C, si dhe virusi Epstein-Barr, luajnë një rol të konsiderueshëm. Virusi Epstein-Barr, në veçanti, është lidhur me një gamë më të gjerë kanceresh sesa mendohej më parë, duke kërkuar kështu vëmendje dhe kërkime të mëtejshme.
Studiuesit theksojnë se një numër i konsiderueshëm i këtyre rasteve mund të shmangen plotësisht. Vaksinimi kundër HPV-së dhe hepatitit B, së bashku me kontrollet shëndetësore të rregullta dhe trajtimet antivirale, paraqiten si hapa kyç për të reduktuar barrën e sëmundjeve të lidhura me kancerin.
Më shumë se 75% e rasteve të kancerit të shkaktuara nga infeksionet janë raportuar në vendet me të ardhura të ulëta dhe të mesme, ku aksesit në shërbimet shëndetësore është i limituar. Ky realitet kërkon përpjekje të shtuara për përmirësimin e infrastrukturës shëndetësore në këto rajone. Vaksinimi efektiv dhe diagnostikimi i hershëm mbeten dy shtyllat kryesore për parandalimin e kancerit dhe reduktimin e numrit të viktimave në mbarë botën.
