Edhe pse shumë mund të kenë menduar se ishte thjesht një thashethem i radhës apo një tekë kalimtare, duket se Mateo Borri po i merr gjërat jashtëzakonisht seriozisht kur bëhet fjalë për tregun muzikor.
Ish-finalisti i BBVA 5, i cili ka tërhequr jo pak vëmendje tek audienca me rrugëtimin e tij televiziv dhe natyrën e tij të drejtpërdrejtë, tashmë është gati të hapë një kapitull krejtësisht të ri në jetën e tij publike duke provuar veten si këngëtar.
Së fundmi, ai ka vendosur të shuajë kureshtjen e ndjekësve duke ndarë një fragment të shkurtër të asaj që pritet të jetë kënga e tij e parë, duke konfirmuar zyrtarisht zërat që qarkullonin. Dhe gjejeni pak se kush fshihet pas këtij projekti?
As më pak e as më shumë se Kelly, këngëtari dhe ish-banori i sezonit të shkuar të të njëjtit format, i cili ka marrë përsipër të kuratojë këtë debutim nga ana muzikore.
Dyshja duket se ka gjetur gjuhën e përbashkët në studio, teksa Mateo i është drejtuar mikut dhe bashkëpunëtorit të tij me një pyetje publike: “Kur do të dalë kënga mjeshtër?”.
Ky projekt muzikor nuk do të mbetet gjatë në sirtar, pasi premiera e madhe është paralajmëruar të ndodhë pikërisht këtë të premte, ekskluzivisht në formatin e njohur të ekranit, “Top Arena”. Mbetet për t’u parë se si do të pritet kjo lëvizje e guximshme nga publiku. /Prive By Liberta Spahiu
