Policia Shqiptare ka shpallur në kërkim Eduard Kuçin, i cili dyshohet të jetë përfshirë në incidentin e fundit që ka vënë në pranga Jozefin Markun dhe Kristjan Nikollin. Gazetarja Anila Hoxha raporton se Kuçi përballet me akuzën e “moskallëzimit të krimit”, pasi nuk ka njoftuar autoritetet për sulmin, duke e konsideruar atë fillimisht si një “mosmarrëveshje të thjeshtë për shkak të bllokimit të rrugës me makinë”.
Pas verifikimeve të kryera, policia ka konfirmuar ngritjen e akuzës ndaj tij dhe ka nisur kërkimin. Hoxha sqaroi se bëhet fjalë për një kërkim policor, jo një masë e caktuar nga gjykata apo prokuroria, me qëllim marrjen e sqarimeve të mëtejshme lidhur me ngjarjen.
Ndërkohë, Prokuroria e Tiranës ka paraqitur kërkesën për masën e sigurisë “arrest me burg” për Jozefin Markun dhe Kristjan Nikollin, ndërsa pritet vendimi i gjykatës. Hetimet vijojnë gjithashtu për dëmtimet e mundshme trupore të Eduard Kuçit, për të cilat është kërkuar akt-ekspertim, si dhe për çështjen e përdorimit të simboleve të Policisë së Shtetit gjatë incidentit.
Hetimet për këtë rast nuk janë nisur nga një denoncim i Eduard Kuçit, por nga iniciativa e vetë policisë pas shqyrtimit të pamjeve filmike të ngjarjes. Çështja mbetet nën hetime aktive.
