Pas fitores historike të Spanjës në Kupën e Botës, mbrojtësi Marc Cucurella po përgatitet të mbajë premtimin e tij për t’i bërë tatuazh fytyrën trajnerit Luis de la Fuente. Ky veprim ka marrë vëmendjen e tifozëve dhe medias sportive.
Pas triumfit 1-0 ndaj Argjentinës, De la Fuente komentoi me humor premtimin e mbrojtësit: “Nëse bën një premtim, duhet ta mbash. Nuk jam edhe aq i shëmtuar”, duke shtuar më tej kuriozitetin rreth këtij vendimi.
Cucurella, menjëherë pas ndeshjes, kërkoi ndihmën e ndjekësve të tij në rrjetet sociale duke pyetur: “A ka ndonjë tatuator këtu?”, duke treguar vendosmërinë për të realizuar gjestin.
Lidhur me vendndodhjen e tatuazhit, Cucurella për mediat si “MARCA” deklaroi: “Ende nuk e di. Duhet të mendohem se ku, do ta vendos. Njerëzit do të më pyesin, kështu që ndoshta nuk duhet të jetë në një vend shumë të dukshëm”, duke theksuar se po e trajton seriozisht këtë çështje.
Duke reflektuar mbi suksesin e ekipit, Cucurella u shpreh: “Jam shumë krenar dhe i lumtur. Nuk është e lehtë të arrish deri këtu. Gjatë karrierës, sidomos kur je i ri, duhet të marrësh vendime të vështira”. Ai gjithashtu falënderoi mbështetësit: “Të gjithë ata njerëz, i falënderoj për këshillat e tyre, ashtu si edhe të gjithë ata që më kanë ndihmuar. Ne kemi qenë kokëfortë, nuk jemi dorëzuar kurrë dhe sot kemi shpërblimin që jemi këtu”.
Pas finales në “MetLife Stadium”, ai shtoi: “Kjo verë nuk ka qenë e lehtë për ne, por jam shumë i lumtur. Kemi qenë bashkë për një kohë të gjatë. Erdhëm këtu me një objektiv, kemi bërë pothuajse 50 ditë grumbullim dhe tani është koha ta festojmë, të jemi bashkë dhe të kujtojmë të gjitha historitë tona”.
