Deputetja britanike Alicia Kearns ka shprehur shqetësim të thellë lidhur me zhvillimet e fundit në Kosovë, duke theksuar rolin e fortë të Mbretërisë së Bashkuar në mbështetje të shtetit më të ri të Evropës. Kearns, e cila ka qenë zëri kryesor për Kosovën në Parlamentin britanik, ka kërkuar një qasje më të ashpër ndaj Serbisë, duke e akuzuar atë për përpjekje të vazhdueshme për të minuar shtetësinë e Kosovës.
Në një intervistë për KosovaPress, Kearns foli për lidhjet e Serbisë me Rusinë dhe Kinën, duke i cilësuar ato si potencialisht destabilizuese. Ajo gjithashtu komentoi situatën politike në Kosovë, duke theksuar rëndësinë e tejkalimit të ngërçeve institucionale për të siguruar qeverisje efektive dhe përparim.
Deputetja britanike vuri në dukje mbështetjen e fortë të Britanisë për Kosovën, duke përmendur kërkesën për anëtarësimin e saj në Këshillin e Evropës. Ajo theksoi se standardet duhet të jenë të qarta dhe se drejtësia për sulmin në Banjskë, duke përfshirë arrestimin e Milan Radoiçiq, është e domosdoshme. Kearns nuk e mbështet Asociacionin e komunave me shumicë serbe, duke theksuar se të drejtat e serbëve të Kosovës tashmë janë të garantuara nga Kushtetuta dhe se çdo iniciativë duhet të funksionojë brenda kuadrit shtetëror të Kosovës.
Fluturim direkt – Prishtinë → Stuttgart
Nisje: çdo ditë
Fluturim direkt – Prishtinë → Munich
Nisje: çdo ditë
Fluturim direkt – Prishtinë → Goteburg
Nisje: çdo ditë
Duke folur për marrëdhëniet me aleatët, Kearns nënvizoi rëndësinë e bashkëpunimit strategjik dhe dialogut të drejtë me Serbinë. Ajo shprehu shqetësim për lidhjet e Serbisë me Kinën dhe mbështetjen e saj për Rusinë pas agresionit në Ukrainë, duke bërë thirrje për kujdes nga fuqitë perëndimore.
Kearns inkurajoi Kosovën të vazhdojë përpjekjet kundër korrupsionit dhe të forcojë sovranitetin e saj, duke besuar në potencialin e madh të vendit dhe energjinë e qytetarëve të saj për të avancuar. Ajo përfundoi duke theksuar se Kosova është pjesë e komunitetit euroatlantik dhe duhet të ankorojë më tej pozicionin e saj përmes përparimit të vazhdueshëm.
