Në një operacion të zhvilluar mëngjesin e së enjtes në zonën e Ujmanit, forcat e Policisë së Kosovës kanë ofruar asistencë për punonjësit e ndërmarrjes publike “Ibër-Lepenci” në procesin e lirimit të një prone që pretendohet të jetë uzurpuar.
Objekti në fjalë, moteli “Jezero”, është rrethuar me shirit sigurie si pjesë e aksionit. Zëvendësdrejtori i Policisë së Kosovës për rajonin e veriut, Veton Elshani, ka konfirmuar angazhimin e policisë në këtë operacion, duke theksuar se ky veprim po kryhet në bashkëpunim të ngushtë me institucionet përgjegjëse, përfshirë Ministrinë e Mjedisit, Planifikimit Hapësinor dhe Infrastrukturës.
Ky aksion vjen pas skadimit të afatit të vendosur nga “Ibër-Lepenci” për shfrytëzuesit aktualë të motelit, të cilët ishin urdhëruar të lirojnë pronën për shkak të pretendimeve të ndërmarrjes për shfrytëzim të paautorizuar. Të pranishëm në zonë janë parë punonjës të “Ibër-Lepencit” dhe zyrtarë policorë, duke siguruar mbarëvajtjen e procesit.
