Pas një ngjarjeje të rëndë që ka tronditur jetën e saj personale, këngëtarja Eli Fara ka reaguar me një mesazh të fuqishëm për publikun.
Ajo shprehet se ndjehet e lënduar, por jo e turpëruar, duke theksuar se ata që shpërndajnë materiale të tilla duhet të ndihen të turpëruar për veprimet e tyre.
“Përjetoj një dhimbje që nuk ia uroj asnjë gruaje: cenimi i privatësisë dhe përballja me gjykime e fyerje që prekin edhe familjen time”, shkruan ajo në reagimin e saj.
Eli Fara ngre shqetësime të rëndësishme mbi mënyrën sesi gratë përballen me stigmatizimin shoqëror, duke theksuar se shpesh ato mbajnë mbi supe turpin e veprimeve që kryhen kundër tyre.
“Gratë u cenohen privatësinë dhe pastaj u kërkohet të japin llogari. I lëndojnë dhe pastaj i gjykojnë për mënyrën si e përballojnë dhimbjen. Asnjë grua nuk duhet të kalojë nëpër këtë poshtërim”, shprehet ajo.
Ajo thekson se çështja do të trajtohet nga drejtësia dhe bën thirrje për njerëzillëk, duke kërkuar ndalimin e shpërndarjes së materialeve që thellojnë dhimbjen e individëve dhe familjeve të tyre.
“Para çdo gjykimi, mendoni për njeriun dhe familjen që po lëndoni”, shkruan ajo, duke apeluar për empati dhe mirëkuptim.
Në përfundim, artistja falënderon të gjithë ata që e kanë mbështetur, duke theksuar se dashuria dhe mbështetja e tyre i japin forcë për të vazhduar përpara “me dinjitet dhe me kokën lart”.
