Presidenti i Barcelonës, Joan Laporta, ka bërë një deklaratë të fortë nga Dallasi lidhur me interesimin për sulmuesin e Atlético Madridit, Julián Álvarez. Ai theksoi se klubi katalanas nuk do të presë pafundësisht për një përgjigje nga ana e rivalëve të tyre.
Laporta shprehu qartë që Barcelona nuk do të kërcejë sipas muzikës së askujt, duke theksuar se ata janë ata që vendosin ritmin e negociatave. “Kemi bërë një ofertë, por ajo nuk është pa afat dhe nuk do të mbetet përgjithmonë në fuqi. Do të shohim deri kur do të jetë e vlefshme,” tha ai.
Ai sqaroi se marrëdhëniet me Atlético Madridin janë të mira dhe se nuk ka pasur ndonjë presion të shtuar nga Barcelona. “Pati vetëm një keqkuptim për ofertën, të cilin e sqarova. Që atëherë nuk ka pasur zhvillime të tjera,” shtoi Laporta.
Laporta ndodhet në Dallas për të mbështetur lojtarët e Barcelonës që janë pjesë e kombëtares së Spanjës. Ai vlerësoi performancat e disa lojtarëve të rinj si Lamine Yamal, Pedri, Dani Olmo dhe Pau Cubarsí, duke shprehur gjithashtu keqardhje për Jules Koundé, i cili është duke luajtur me Francën.
Përsa i përket Raphinhës, presidenti konfirmoi se ai do të vazhdojë të jetë pjesë e Barcelonës, duke e cilësuar atë si një lojtar kyç për ekipin. Ndërsa për të ardhmen e Ferran Torres, ai zgjodhi të mos komentojë, duke lënë hapësirë për spekulime.
[[M1]]
[[M2]]
[[M3]]
